防守數據英超包尾 蘇斯克查:我唔會辭職!

#英超 #蘇斯克查

曼聯周日(24)喺英超經歷恥辱慘敗,主場出擊吞死敵利物浦5蛋,連傳奇領隊費格遜都睇到搖頭嘆息。數據顯示,曼聯今季嘅防守係全英超最差,轉會費超過2億鎊嘅防線淪為豆腐渣,不過領隊蘇斯克查賽後就回應要佢下台嘅聲音,表明唔會依家放棄,拒絕辭職。


據英國《天空體育》統計,曼聯今季9場英超只有1場保持不失球,僅僅好過屈福特同紐卡素排第18位;講到實際防守數據就更差,今季場均只有11.5次攔截排英超包尾,因個人犯錯導致失球次數亦係英超最多,包括今場哈利馬古尼同勞基梳爾「撞埋一齊」,送利物浦射入2比0嘅一球。


蘇斯克查嘅帥位受到質疑,不過呢位挪威教頭賽後堅決表示唔會辭職:「我已經走咗好遠嘅路,球隊亦都進步咗好多,依家已經非常接近目標,唔係選擇放棄(辭職)嘅時候。我相信自己,近期成績會令人產生懷疑,但我會相信球隊一直以嚟嘅計劃。」